التخطي إلى المحتوى

النكات ما هي إلا قصص مواقف تُضحِك، ولكن يوجد نكت الخليل كوميدي وحمادة سلطان لا تؤتي بثمارها أحيانًا في إضحاك الناس، إلا أنه يوجد فئة تُفضل هذا النوع من النكات وتضحك عليه.. فهي عبارة عن مواقف قد تبدو تافهة في نظرك، وعند نظر شخص آخر مضحكة؛ لذا من خلال هذا الموضوع الذي سيعرضه لكم موقع محتوى سنتعرف أكثر على هذا النوع من النكات.

نكت الخليل كوميدي رخمة

نكت الخليل كوميدي

نتعرف في هذه الفقرة عن بعض النكات الرخمة الطويلة، وكلمة رخمة تعني الركاكة والاستفزاز، ولكنها تأتي على هيئة قصص طويلة.. يمكن لهذه النكت أن تُضحكك أو أن تجعل مزاجك سيء، ونعرض لكم تلك النكات الرخمة من خلال الآتي:

  • مرة واحد عنده 15 قملة فى شعره، راح للدكتور فقال له: أنت تغسل شعرك بمياه ساخنة وتنام.. فلما روح عمل كدة، صحى الصبح سمع قملتين بيتكلموا الأولى بتقول للثانية: شفتى موجة الحر بتاعة امبارح ديه قتلت واحدة من عندنا.. راح للدكتور تانى قال له: لازم تروح تغسل شعرك بمياه باردة، و لما روح بردو عمل كدة.

لما صحى الصبح سمع نفس القملتين بيتكلموا فالأولى بتقول للثانية: شوفتي موجة البرد بتاعة امبارح دى قتلت واحدة منا.. فراح للدكتور قال له: مفيش غير حل واحد هو إنك تنام على جنب واحد شعره مليان قمل فعمل زي ما الدكتور طلب منه، صحى الصبح سمع القملتين بيقولوا شفتي الحرب بتاعة إمبارح ديه قتلت منا 7 قملات، ففرح أوى قام سمع التانية بتقول: وإيه يعنى ما إحنا أسرنا منهم 50.

  • مرة عيل رخم راح لواحد بتاع جيلاتي فقال له: عمو عمو عندك جيلاتي بالكوسة، فالراجل قال له: لا، قام الولد مشي.. تاني يوم راحله الولد قال للراجل بتاع الجيلاتي: عمو عمو في جيلاتي بالكوسة، الراجل قال له: لا، قام الولد مشي تاني.

لما قعد الراجل ده على القهوة اشتكى لصاحبه، فصاحبه نصحه إنه لما يجيله تاني يقولوا إنه عنده.. لما جه الولد تاني يوم قال للراجل: عمو عمو عندك جيلاتي بالكوسة، قال له: ايوة عندي.. راح الولد قال له: يع.

نكت الخليل كوميدي طويلة بايخة

بعد أن تعرفنا على شكل النكتة الطويلة من الفقرة السابقة.. نتعرف الآن على بعض النكات الطويلة البايخة من خلال النقاط التالية:

شاهد أيضا:

مرة واحد راح للبقال قال له: عندك عيش، البقال قال له: اه، قام قال له: عندك بيض.. قام البقال قال له: أيوة، فقال له: عندك جبنة، البقال قال له: اه.. قام قال له: طب ما نفطر مع بعض.

اليابان اخترعت كمبيوتر يجاوب على أي سؤال، وفي التجارب الكمبيوتر فعلًا كان بيجاوب على كل الأسئلة.. دخل مصري سأله سؤال الكمبيوتر معرفش يجاوب، قالوا له: هو أنت سألته ايه؟ قال لهم: قولت له أبو قردان قبل ما يخلف قردان كان اسمه ايه.

مرة واحد قال لمراته: اعملي على الغدا محشي بقا، قالت له: معرفش، قام متعصب وراح الشغل.. لما رجع لقى السفرة مليانة محشي، قال لها: مين اللي عمل المحشي، قالت له: معرفش.. قام رايح للبواب حكى له البواب قال له: يا بيه الشقة كدا مسكونة، الراجل قال له: خلاص أنا همشي من الشقة دي.. طلع فوق لقى العفش مفكوك والعفاريت بتقول: هييه هنعزل هنعزل.

مرة سلحفاة راحت مطعم وطلبت رز، الجرسون قام شايلها ورماها بره المطعم.. السلحفاة رجعت للمطعم بعد شهر وقالت للجرسون: طب متزقش بس.

محشش كان في حرب ولم 35 قتيل ورماهم في العربية، وهو راكب العربية سمع في الراديو سقوط 30 قتيل.. قام موقف العربية وقال لهم: يلا الخمسة اللي بيستعبطوا ينزلوا.

اثنين مساطيل بيكلموا بعض، فواحد قال للثاني: أنا حلمت إني رحت فرنسا، الثاني قال له: وأنا حلمت إني بتجوز.. الأولاني قال له: يا معفن ومعزمتنيش، قام الثاني قايل له: يا عم سألت عليك قالوا لي إنك في فرنسا.

نكت بايخة قصيرة

نتعرف في هذه الفقرة عن نكت رخمة وبايخة قصيرة، تتميز بالاختصار والإتيان بالمغزى دون الإطالة على المستمع، ونتعرف على تلك النكات من خلال الآتي:

  • مرة واحد كان راكب ترام نزل محطة الرمل رجله غرزت.
  • مرة اتنين ضربوا بعض، بعض مات.
  • مرة مدير عام في شركة والتاني عام في البحر.
  • مرة مدير عام والتاني غرق.
  • مرة واحد مات باقي الأرقام عملت له عزا.
  • مرة حلة شاطت جابت جول.
  • مرة واحد راح خان الخليلي، فالخليلي رفع عليه قضية.
  • مرة واحد وقف تاكسي قال له فاضي يسطا، قال له: اه.. قال له: أنا بقى مش فاضي.
  • مرة واحد راح مطعم فقال للجرسون: عندكم عشا، قالوا له: اه.. قالوا له: طب ليه محدش عزمني.
  • مرة واحد جي يقعد على قهوة، قعد على شاي.
  • واحد راح حديقة الحيوان، شاف قفصين.. واحد فيه ذئاب والثاني فيه عودة.
  • واحد شاور لتاكسي قال له: رشدي على البحر؟ قال له: أنا ايشعرفني على البحر ولا في بيتهم.
  • دخل واحد عند البقال قال له: عندك سكر، قال له: اه.. قال له: ربنا يشفيك.
  • مرة واحد فكهاني، والثاني ربط هاني.
  • مرة واحد ركب القطر المكيف، فقعد جنب واحد فقال له: أنا بردان من التكييف.. الثاني قال له: وأنا عوض من ميت كرفس.
  • مرة واحد دخل محل حلويات بفلاشة، عشان يحمل عليها ثمانية كيكة.
  • واحد بيسأل صاحبه قال له: النهاردة السبت ولا الحد، قام صاحبه قال له: الاتنين.. قال له: ياااه الاتنين جايين مع بعض.
  • واحدة اتجوزت من ورا أبوها، قام أبوها لف وشافها.
  • واحدة اسمها ساندي دخلت كلية الهندسة، فبقت ساندي متر مربع.
  • لو حد قال لك أنت فين بالظبط، قول له أنا في التطبيقات.
  • كمسرى راح يتجوز لقى المهر ناقص، راح كتب الباقى على دهر التذكرة.

نكت على هيئة أسئلة

يوجد نكت رخمة على هيئة سؤال وجواب، وهي من أنواع النكات القديمة والشائع استخدامها إن كانت النكتة بايخة.. ونتعرف أكثر على هذا النوع من خلال الآتي:

عارف ليه السمكة بتخاف من اتصالات؟ عشان دي أقوى شبكة في مصر.

ليه القطر مهم؟ عشان تحتيه خطين.

ليه اليابان قاسية؟ عشان هي في قارة آسيا.

ليه ساندوتش الكفتة بيجري؟ عشان ده وجبة سريعة.

ليه البرازيل معندهاش تين؟ عشان هي في قارة لاتينية.

ليه الفيل لما بينزل البحر بيلبس الشورت الأحمر؟ عشان الشورت الاسود مغسول.

ايه الحاجة اللي بتجري وعندها راسين و8 رجول؟ كلبين بيجروا جنب بعض.

ليه القرد بيجري بسرعة؟ عشان القرد في عين أمه غزال.

ليه الحمار الوحشي قديم؟ عشان أبيض وأسود.

ليه القنفذ جديد؟ عشان لسه بشوكه.

حاجة ليها أربع رجول وطايرة في الهوا؟ كلب مضروب بالشلوت.

ليه النملة لما بتركب العجلة مبترداش تركب الفيل قدامها؟ عشان بيلعب في الجرس.

فرخة معلقة سلسلة فيها صورة بيض مقلي ليه؟ دي آخر صورة لأخوها اللي مات.

ايه الفرق بين عمرو دياب وإليسا؟ إليسا بتعمل شريط كاسيت.. وعمرو دياب بيعمل شريط كراجل.

ليه المنبه بيرن؟ عشان معهوش رصيد يتصل.

ليه القطة بتخربش؟ عشان عايزة تكسب.

ليه الفيل بيليس شرابات خضرا؟ عشان خضرا بتلبس الشرابات بتاعته.

ازاي نحط فيلين في برطمان من غير ما يلمسوا بعض؟ نحط فيل تالت بينهم ونحطهم عادي.

ايه الفرق بين البطيخ والشمام؟ الاتنين إجازة الحلاقين.

الفراعنة ريحة بوقهم حلوة ليه؟ أصل عندهم أبو الهولز.

ليه الناموسة متفوقة؟ عشان إجابتها نموسجية.

ليه السمكة بتخاف من الجنيه؟ عشان فيه 100 قرش.

ليه الفار بيروح للكمبيوتر كتير؟ عشان يتكلم مع الفارة.

نكت الخليل كوميدي متنوعة

نعرض لكم في هذه الفقرة بعض نكت الخليل كوميدي، سواء كانت قصيرة أم طويلة أو على هيئة أسئلة، فهذه الفقرة شاملة لكل الأنواع.. فيما يلي سنتعرف على عدد من هذه النكات:

  • قالوا لبخيل: تعمل ايه لو الدنيا برد، قال لهم: هقرب من الدفاية.. قالوا له: طب لو برد أوي، قال لهم: هقرب أكتر من الدفاية.. قالوا له: طب لو برد أوي أوي، قال لهم: هلزق في الدفاية.. قالوا له: طب لو نزل تلج، قال لهم: لا كدة هضطر اشغل الدفاية.
  • مرة واحد عنده سكر راح لدكتور رخم، قال له: حط له شوية نمل.
  • مرة حرامي قاعد مع خطيبته في مطعم وفجأة النور قطع، فقالت له: يلا خد فرصتك.. قام أخد الشنطة وجري.
  • واحد خلع الباب بتاع البيت ونزل الشارع، قابل جاره فجاره قال له: انت رايح فين.. قال له: هودي الباب للنجار يصلحه، فجاره قال له: طب مش خايف بيتك يتسرق.. قال له: لا طبعًا أنا معايا الباب الحرامي هيخش منين؟
  • مدرس اتجوز مدرسة كتبوا الكتاب على الوايت بورد.
  • في أسد بيقول مياو ليه؟ لسة مبلغش.
  • هو يوم الخميس يوافق يوم 20؟ لو ضغطنا عليه هيوافق.
  • عيل رخم خبط على جيرانه قال لهم: عندكوا جزر، قالوا له: أيوة.. قال لهم: واحنا كمان.
  • اتنين راحوا للحلاق، واحد حلق والتاني خاتم.
  • واحد ميكانيكي فتح محل شيكولاتة سماه كلاكسي.
  • عملوا جايزة مليون جنيه للي مخلف 10 أطفال، ففي راجل عنده تسعة، قال لمراته أنا متجوز عليكي ومخلف واحد هروح أجيبه واجي.. لما جه ملقاش العيال ولما سأل عليهم مراته قالت له: أبو كل ولد جه وخده.
  • مرة بنت اسمها نور شربت مياه اتكهربت.
  • واحد بتاع سمك ابنه مات، قام قايل: ده كان لسه صاحي وبيلعب.
  • عمرو دياب اتصل مرة بمستشفى، الموظف قال: مين معايا.. قام عمرو قال له: تمرجي معاك.

نكت رخمة من الخليل كوميدي

يعتبر الخليل كوميدي واحدًا من الأشخاص الذين ذاع سيطهم في الوطن العربي بسبب نكته التي يلقيها، والتي تكون في أغلب الوقت سمجة وغير مضحكة.. ونتعرف على هذه النكت فيما يلي من نقاط:

  • ليه الدكتور لما مريض بيجيله بيديله بنج؟ عشان معندهوش بلياردو.
  • مرة واحدة اشترت بطانية فايبر، قامت أختها اتغاظت واشترت التانية واتس.
  • مرة برتقانة معصورة، والتانية مع فيديو.
  • ليه القطر بيقف قدام الصيدلية؟ عشان يعاكس القطرة وهي خارجة من الصيدلية.
  • ليه الإنجليزي مغذي ومفيد؟ عشان فيه but و with.
  • مرة دكتور نسا والتاني افتكر.
  • مرة واحد ساب عربيته دايرة ونزل يشتري حاجة.. رجع لقاها مربع.
  • مرة واحد بتاع فطير اشتغل مخرج عمل فيديو كريب.
  • ليه شعار الصيدلية تعبان؟ عشان اللي بيروحوا للصيدلية تعبانين.
  • ما الدولة القريبة من USA؟ الإجابة USB.
  • ليه رقم تمانية نشيط؟ عشان بيعمل تمانين الصباح.
  • واحد بيسأل واحد قال له: أنت رايح فين؟ قال له رايح الجيم، قال له: ليه؟ قال له: رايح أجيم شوية هوا.
  • مدرس رياضيات بيسأل مراته: الغسيل اتنشر، قالت له: لا 13.
  • واحد بيسأل صاحبه: البنك فاتح، قال له: لا غامق.
  • واحد دخل معاه شيبسي في الامتحان، عشان فيه مواد حافظة.
  • مرة واحد جاب شعره على جنب عشان كان عايزه في موضوع.
  • مرة واحد اسمه أمين عمارة حب ينتحر، قام نط من فوق أبوه.
  • ليه دكتور العمليات بيلبس أخضر؟ عشان العملية بتبقي في منتهى الخضورة.
  • ليه بنشرب الميه؟ عشان مينفعش ناكلها.
  • طالب دخل امتحان رياضة فجاله سؤال “ما هو ميل الخط المستقيم”، الطالب كتب “مستقيم آت ياهو دوت كوم”.
  • واحد اشترى لاب توب لأول مرة ومش فاهم فيه حاجة، ضغط على زرار الاسطوانات بالغلط.. فطلع له مكان الأسطوانة من الجنب، قال: ياه حتى كوباية الشاي عماملنلها مكان.

القراء الذين اضطلعوا على هذا الموضوع قد شاهدوا أيضًا:

نكت مملة طويلة

نكت رخمة

نعرض لكم في هذه الفقرة أبرز نكت الخليل كوميدي مملة، التي تتسم بالطول والسماجة.. ونادرًا ما يضحك الناس لمغزاها، نتعرف عليها من خلال النقاط التالية:

سلحفتين صغيرين كانوا بيحبوا بعض جدًا، لما كبروا واتجوزوا خلفوا سلحوف صغير سموه سريع، اقترحت أم سريع على أبو سريع إنهم يروحوا يتفسحوا في البحر الأحمر.. جهزوا حاجات الرحلة واستغرقت الرحلة 15سنة ذهاب، لما وصلوا علي البحر وفرشوا علشان يأكلوا، فجأة صرخت أم سريع وقالت: تصدق يا أبو سريع نسينا أهم حاجة.. نسينا الملاحة عشان الأكل اخطف رجلك وروح البلد هاتها.

أبو سريع قال: لسه هروح وآجي في 30 سنة كدا الأكل هيبرد الأحسن نبعت الواد سريع خفيف ولسة صغير، ونادوا سريع وقالوا له وبعتوه يجيب الملاحة ومرت السنين، عدى حوالى40 سنة وسريع مجاش، السلاحف بدأت تقلق فقالت أم سريع أحسن ناكل بدل ما الأكل يبرد ولما ييجي سريع نعمله أكل ثاني.. وبدأوا ياكلوا، فجأة خرج سريع من ورا الشجرة وقال لهم: يعني لو كنت رحت كنتم اكلتم من غيري.

صبي ميكانيكي اسمه بلية قال للأسطى بتاعه: أنا أعرف رئيس الحي ذات نفسه، قام الأسطى قال له: امشي ياض العب بعيد.. بعد شوية عدى رئيس الحي وراح مسلم على بلية، قام قال للأسطى: مش قلت لك ده أنا كمان أعرف الوزير.. وراح الوزير معدي وسلم على بلية والاسطى مندهش، بلية قال له: بص بقى أنا هجبلك من الآخر أنا أعرف جورج بوش.

قام الأسطى قال له: المية تكدب الغطاس، بلية قال للاسطى استنى هنا وانا وجورج هنطلع نسلم عليك من البلكونة، وفعلًا طلع بلية وبوش من البلكونة وشاوروا للأسطى.. بصوا لقوا الأسطى أُغمى عليه.. وفالمستشفى بلية قالوا له: أنت أغمى عليك عشان شفتني مع بوش، قال له: لا أنا أغمى عليا لما اتنين معديين سألوني مين اللي مع بلية دا؟

نكت سخيفة للخليل كوميدي

النكت السخفية هي نكت رخمة ولكن بشكل قصير، لا تفهم مغزاها أو معناها.. ولكن توجد فئة من الناس تعشق هذه النكات، والتي نعرضها فيما يلي من نقاط:

عفريت فتح محل سمك سماه سُبيط لُبيط.

روماني فتح فرن سماه يوليوس كايزر.

اتنين قاعدين في عزا، واحد قال للتاني: عزيت؟.. التاني قال له: لا على الزبدة.

واحد محشش زرع وردة طلعتله شادية.

مرة واحد رجع في قراره فخبط في الحيطة اللي وراه.

ليه النمر بيحب العربيات؟ عشان يعاكس النمرة.

مرة واحد نام ساعة صحى لقى نفسه حظاظة.

مرة واحد بلع فوطة ريئه نشف.

شيطان اتجوز شيطانة خلفوا ولد سموه أبو المعاصي.

السمكة لما تيجي تحلق بتحلق ايه؟ كابوريا.

خياط اتجوز خياطة عملوا فرحهم في يوم القميص.

مرة واحد اسمه حنفي كان ماشي بينقط.

ايه هو ساندوتش لم الشمل؟ برجر دجاج بالبيض.

مرة حبتين بُن واحدة عيطت قامت التانية قالتلها coffe عن البكاء.

كوكب دائمًا على حق من هو؟ المشتري.

يوجد عملية عملولها حفلة ليه؟ نجحت.

الناس اللي نجت من جيش الروم قاعدين فين؟ living room.

صيدلي حب يعمل شوبينج راح باراسيتامول.

مرة صابونة صدعت من كتر الرغي.

مرة جرافيك ديزاينر كبر دماغه، دماغه بكسلت.

مرة واحدة اسمها ملك، وقعت على وشها بقت كتابة.

واحدة قالت لجوزها: افرح هنبقي تلاتة، قال لها: ليه انتي حامل.. قالت له: لا ماما هتيجي تقعد عندنا.

ليه النت بطئ؟ عشان بيمشي داتا داتا.

مرة واحد داس فرامل مع بنزين عمل سكرين شوت.

تليفون وقع من الدور السادس متكسرش ليه؟ كان معمول على وضع الطيران.

مرة واحد اسمه زهران لما كبر بقا بينام بدري.

مرة واحد اسمه صبحي لما كبر بقا رجلي.

نكت رخمة لحمادة سلطان

حمادة سلطان من أشهر الأشخاص الذين يلقون النكت على الناس، ولكن لديه بعض النكات التي لم يحالفه الحظ بها، وقد رحل هذا الراجل عن عالمنا عام 2015.. إلا أن تراثه ما زال موجودًا، ونتعرف عليها من خلال الآتي:

مرة واحد دخل محل سمك فلقى نوع اسمه سبيط، قال للبياع: ايه ده، الراجل قالوا له: دي سمكة سبيط بتتعمل بـ كذا وكذا وكذا.. المهم الراجل قال للبياع: اكتبلنا الوصفة في ورقة، المهم الراجل ماشي السمك في ايد والورقة في ايد، قام في كلب خطف منه السمك.. الراجل بصلوا وضحك كدا وقالوا له: مش هتعرف تعمله الوصفة معايا.

مرة واحد راح لواحد صاحبه قال له: نفسي أعمل مزرعة بقر، صاحبه قال له: خلاص جيب شوية سكر ورشهم في الأرض وجيب شوية مياه، صاحبه راح عمل كدا ولما صحي شاف شوية نمل.. قال: يا سلام شوف البقر وهو صغير حلو ازاي.

مرة واحد راح مطعم وبعد الأكل أخد المعلقة بتاعة المطعم وطلع، مسكوه وسألوه عملت كدا ليه؟ قال لهم: أصل الدكتور قالي خد معلقة بعد الأكل.

مرة صعيدي قعد جنب نصاب في مطعم، فالصعيدي طلب سمكة كبيرة والنصاب طلب سمكة صغيرة، فالنصاب عايز ياخد السمكة الكبيرة قام قال للصعيدي: تعرف يا بلدينا إن السمكة بتلف؟ قال له: ازاي؟ قال له: كدا (قام لافف الأطباق).. الصعيدي لف الأطباق تاني وقال له: وحياة أبوك سيب الدنيا على حالها.

واحد اترفد من وزارة الصحة، واحد قابله قال له: ازي الصحة.. قال له: ما سبناها.

اتنين في لندن شافوا توبيس بدورين، الأول قال للتاني: بقولك ايه أنا عايز أركب فوق.. قام التاني قال له: لا أخاف فوق مفيش سواق.

حلاق اشترى بطيخة طلعت قرعة، قال لها: حتى انتِ بتحلقي برة.

نكت سمجة عن البخل

هذه الفقرة مخصصة للأشخاص البخيلة، والبخيل هو الذي لا يريد أن ينفق أبدًا.. فنعرض لكن أجدد نكت رخمة عن البخل من خلال الآتي:

  • بخيل اتجوز بخيلة جابوا بنت سموها حصالة.
  • مرة واحد بخيل عايز يدهن بيته، دهن حيطة باللون الأبيض وكتب على الباقي نفس اللون.
  • مرة واحد بخيل كان بياكل لب، فمراته قالت له: هات واحدة، فعطاها أكلتها وبعد كدا طلبت تاني.. قال لها: والله كلهم نفس الطعم.
  • مرة واحد بخيل ابنه حلم أن أبوه اداله 10 جنيه، الولد أول ما صحى راح حكى لأبوه الحلم، قال له: طب هاتها بقا لا انا كنت بهزر.
  • واحد بخيل ضرب عياله ليه؟ لقاهم مشغلين المروحة على 3 وهما اتنين في الأوضة.
  • مرة واحد بخيل اتجوز عمل شعر عسل مع نفسه.
  • مرة واحد بخيل راح المستشفى يزور حماته، لقى الباب مكتوب عليه ادفع.. قال: ربنا يشفيها لما ترجع البيت أبقى أزورها بقا.
  • واحد بخيل كان بيتفرج على حفلة عملاها منظمة خيرية في التليفزيون، أول ما المذيع قال هنبدأ جمع التبرعات.. قام قالب على قناة تانية.
  • بخيل قاعد زعلان مراته سألته: مالك، قال لها: الصيدلية عاملة خصم ومحدش فينا عيان.
  • واحد بخيل راح يشتري ساعة لقاها غالية اشترى ربع ساعة.
  • ثلاثة من البخلاء قرروا يتبرعوا للفقراء، البخيل الأول قال: هرسم دائرة على الأرض وأرمي الفلوس في السماء اللي يقع جواها ليا، واللي يقع براها للفقراء.. قال الثاني: أما أنا هرسم خط على الأرض، وأرمي الفلوس في السماء، اللي على يمين الخط ليا واللي على شمال الخط للفقراء.. التالت قال: أما أنا فهرمي الفلوس فوق، اللي يقع ع الأرض ليا، واللي يفضل في السماء للفقراء.

نكت رخمة مضحكة

نعرض لكم في تلك الفقرة أبرز نكت الخليل كوميدي المضحكة، والتي تتميز بمغزاها المضحك.. ولكن أسلوبها قد يكون ركيك قليلًا، نتعرف عليها من خلال السطور التالية:

واحد عربية خبطته خد تعويض 100 ألف جنيه، قام وقف قدام القطر وقعد يقول: مليونير مليونير.

واحد راح لدكتور باطنة، الدكتور قال له: عندك فيروز في الرئة.. قال له: حلو كمل تدوير هتلاقي هيفاء.

واحد جاب تليفون جديد وحطه في الجيب اللي ورا، نسى وقام قاعد على الكرسي سمع صوت تكتكة.. قال: يارب يكون العمود الفقري.

واحد وراته كانوا نايمين في خيمة، أول ما صحيوا قال لها: شايفة الشمس.. قالت له: اه، قال لها: طب ده معناه إيه.. قالت له: تفاؤل وصباح، قال لها: يا ذكية الخيمة اتسرقت.

واحد مكسل اتجوز واحدة كسلانة كسلوا يخلفوا.

صاحب مزرعة فراخ محمل عربية كلها فراخ وقفته لجنة و سألوه: ايه اللي في العربية ده؟ قال لهم: فراخ، قالوا له: بتأكلها إيه؟.. قال لهم: بأكلها ذرة، قالوا له: غرامة 200 جنيه.. بقا بتأكل الفرخ ذرة والبلد مش لاقية تاكل.

كمل وقفته لجنة تانية سألوه: محمل إيه؟ قال لهم: فراخ، قالوله: بتأكلها إيه؟.. قال لهم: بأكلها زبالة، قالوله: غرامة 300 جنيه بقا يا مفتري بتأكل الفراخ زبالة عشان الناس تتسمم وتموت.

كمل في طريقه وقفته لجنة، الظابط سأله: محمل إيه قال له: فراخ، قال له: بتأكلها إيه؟.. قال له: بص أباشا، أنا بديهم مصروف وكل واحدة تجيب اللي هي عايزاه.

واحد عجوز لقى مصباح سحري، طلع له عفريت فالراجل طلب من العفريت إنه يرجع شباب.. العفريت رجع لسن الأربعين، الراجل طلب يرجع تاني، قام العفريت مرجعه لسن العشرين.. قام الراجل طلب تاني، قام العفريت رجعه لسن 3 سنين.. الراجل جت له الحصبة ومات.

نكت غير مضحكة عن المحششين

أشهر النكت العربية والمصرية هي نكت المحششين، والمحشش هو الشخص السكران الغير دارٍ بالدنيا لأنه شرب سيجارة حشيش.. والمعروف عن هذا النوع أنه مضحك، هيا لنرى نكت رخمة عن المحششين من خلال الآتي:

  • محشش راح المحكمة فالقاضي سأله: متجوز مين، قال له: متجوز واحدة.. القاضي قال له انت بتهزر هو في حد بيتجوز واحد، قال له: أيوه يا باشا أختي متجوزة واحد.
  • اتنين محششين واحد أعمى والتاني مفتح بيشربوا سيجارة واحدة، فالمفتح قال: من الأعمى للمفتح.. قام الأعمي شرب نفسين وقال: من المفتح للأعمى، أول ما المفتح عطى الأعمى السيجارة البوليس كبس والمفتح جري.

الأعمى قال: من الأعمى للمفتح، قام الظابط أخد السيجارة وشربها فاتسطل وقال له: من الظابط للأعمى، قال له: لا يا باشا أنا مبشربش.

  • محشش حط جدول المباريات، فخلى كل الماتشات في يوم واحد عشان يتكيف.
  • محشش نازل من باب عربيته شاف الدنيا بتمطر، قام قفل الباب ونزل من الباب التاني.
  • بيسألوا محشش بيتك فين؟ قال لهم: عارفين بيت هوفين، قالوا له: اه.. قال لهم: أنا البيت اللي جنبه.
  • محشش اتصل بشركة طيران قال للموظف: الرحلة من هنا لأمريكا تاخد أد ايه، الموظف قال له: ثواني.. المحشش قال له: شكرًا وقفل السكة.
  • اتنين محششين قاعدين قدام مرايا، فواحد قال للتاني: بقولك ايه مش واجب بردو نقوم نسلم على الناس اللي هناك دول؟.. لما قاموا لقوا التانيين بيقوموا، التاني قال له: اقعد يا عم أديهم جايين أهم.

بذلك نكون قد تعرفنا على أجدد نكت الخليل كوميدي وحمادة سلطان، وتعرفنا على أنواعها الطويلة والقصيرة.. ليس ذلك وحسب بل تطرقنا أيضًا للتعرف على بعض النكات لعدد من المشاهير، كان هذا موضوعنا نرجو أن تكونوا استفدتم مما قدمناه إليكم من معلومات.

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *